Davao City – Moboto segun sa konsensiya ug sa gipitik sa kasingkasing ug dili diha sa tinaginting sa salapi nga ihatag sa mga kandidato ning panahon sa eleksyon.
Apan subo palandungon tungod ang gihimong basehan sa mga botante karon mao ang kwarta nga ihatag sa mga kandidato nga naga-practice og vote buying.
Gisulti ni Barangay 9-A Captain Tata Llubit, sa eleksyon dili mawala ang vote buying ug natural lamang kini kay mao kini ang pamaagi aron makuha ang ‘majority votes’ aron maseguro ang kadaugan.
Ang eleksyon mao unta ang kahigayonan aron makapili og maayo nga lider kansang ang kasingkasing mao ang pagserbisyo tiunay ug naghunahuna sa kaayohan sa nasud ug sa katawhan.
Apan sukwahi ang nahitabo kay tungod sa tumang kalisod mapugos ang pobreng botante sa pagbaligya sa boto ug pagdawat sa salapi gikan sa mga politiko nga hakog sa gahum ug katungdanan.
Matud ni Llubit, dawaton ang salapi apan moboto ug mupili sa kung kinsa kadtong anaa sa dughan nga sa iyang lantaw, angayan paguniton sa renda sa pagpadagan sa panggamhanan.
Base sa kasinatian ni Llubit, ginagamit sa mga kandidato ang kwarta aron paghaylo sa katawhan.
Kung ang gilantaw sa katawhan mao ang kaugmaon sa nasud ug sa mga anak, hatagan og bili ang kasagrado sa boto ug dili kini ibaligya ngadto sa traditional politicians nga walay laing buhaton mao ang pagpasagad sa ilang serbisyo ug pagpangawkaw sa kwarta sa katawhan, dugang sa kapitan.
RadyoMaN Joel Viray
