Roxas City, Capiz- Igapatigayon subong nga adlaw sa pagpanguna sang Philippine Information Agency (PIA) kag Capiz Association of Government Public Information Officers, Inc. (CAGPIO) sa bulig sang lokal nga pangulohan sang probinsya ang blood-letting ukon boluntaryo nga pagdonar sang dugo nga hiwaton sa City Mall – Roxas.
Ini ang gintig-ulohan nga “Dugtong Buhay” Bloodletting Activity.
Katuyoan sang amo nga aktibidad nga makatipon sang dugang nga supply sang dugo sa blood bank sang Philippine Red Cross – Capiz Chapter.
Ginpahayag ni Mrs. Jemin Guillermo nga hepe sang PIA Capiz Information Center nga mas madamo pa gid nga blood donor ang ginalauman nga boluntaryo nga maga-donar sang ila dugo sa natalana nga Dugtong Buhay nga kabahin naman sang mga aktibidades sang Philippine Information Agency kaangot sa pagdumdom sang Bulan sang mga Kababaihan.
Ang Dugtong Buhay ang kalakip sa 24 ka mga mass bloodletting nga hilikuton sa probinsya karon nga bulan sang Marso base sa rekord sang PRC – Capiz Chapter.
Nahibaluan nga ang inisyatibo sang PIA kag CAGPIO ang tuigan nga ginpatigayon humalin pa sang tuig 2011 apang makaduha ini ka beses nga ginpatigayon sang 2013.
Ang Dugtong Buhay ang ginkilala na sang Department of Health pinaagi sa Sandugo Award sa rehiyonal nga lebel kag masami ginapasidunggan sang PRC kag Provincial Health Office sa ila bersyon sang Sandugo Award sa probinsyal nga lebel.
