RMN CDO- Police Superintendent, gi-ambush sa CdeO karong buntag
Gi-ambush sa gituohang riding in tandem ang usa ka taas nga opisyal sa Police Regional Office o PRO 10 mga alas nuybe karong buntag sa Antonio Luna corner Provincial Capitol Road ning syudad sa Cagayan de Oro.
Daling gidala sa Northern Mindanao Medical Center ang biktima nga si Police Supt. Michael John Deloso nga Deputy Chief sa Regional Police Strategy Management Unit ug padayon karong giatiman sa mga doktor. Sa interview sa dxCC-RMN Cagayan de Oro kang Provincial Disaster Risk Reduction and Management Office o PDRRMO Head Vincent Dy, gibutyag niini nga sa iyang nakita dunay igo sa nawong ug tiyan ang biktima sa dihang gi-atiman sa mga taga PDRRMO ug Red Cross. Sakay sa puting van ang biktima sa dihang nahitabo ang insedente. Niabot sa 27 ka mga basyo sa bala ang nakuha sa mga otoridad sa area ug kapin sa 20 usab ka buslot agi sa bala ang nakita sa sakyanan sa biktima. Sa karon nagpadayon pa ang imbestigasyon sa kapulisan sa crime scene ug gihimo usab ang hot pursuit operation batok sa mga suspek.
-30-
RMN PAGADIAN- Usa patay ug laing usa kritikal sa managsunod nga pagpamusil sa syudad Pagadian City – Sulod lamang sa lima ka oras duha ka lalaki ang biktima sa managlahing insidente sa pagpamusil sa syudad sa Pagadian kagahapong adlawa.
Nahitabo ang unang kaso sa pagpamusil sa Purok Bethlehem, Brgy. Banale nga gikamatay sa usa ka retiradong miyembro sa Philippine Army. Dead on Arrival sa ospital ang biktima nga si Mario Piga, 55 -anyos ug kanhing staff sergeant nga nadestino sa 1st Infantry Tabak Division. Alas 12:45 kagahapon sa udto dihang gipusil sa riding in tandem ang biktima nga si Piga samtang kamulo sa paghugas sa plato sa atubangan nga bahin sa iyang gipuy-an.
Daling niikyas ang mga suspek nga tinaptapan ang nawong human ang pagpamusil ug nakuha sa dapit nahitabo-an ang 12 ka basyo sa bala sa calibre 45 nga pistola.
Lima ka oras ang nilabay laing insidente sa pagpamusil usab ang nahitabo sa Corner kanto Cabrera, Barangay Gatas ning syudad diin samaran 39 -anyos nga empleyado sa Kismet cable TV.
Daling gidala sa pribado nga ospital ang biktima nga si Arnel Maliao alyas ‘ George ‘ nga nga nakabaton sa daghanang igo sa lawas nga kasamtangan pang gi-atiman sa mga doctor.
Gisusi na sa imbestigador sa Pagadian City PNP ang kopya sa CCTV nga posibleng makatabaang sa pas-pas nga pagsulbad sa kaso ug pagtumbok sa identipikasyon sa mga mamumuno.
Nagpadayon ang imbestigasyon sa otoridad sa managsunod sa nga kaso sa nga pagpamusil sa dakbayan sa Pagadian. -30-
RMN DIPOLOG- Nag atubang sa kasong pagpanglugos, nasikop sa PNP. Sibuco, ZDN-Priso pa sa balay bilanguan ang usa ka pinangita sa balaod didto sa may Sibuco MPS human kini gisikop sa gihimong operasyon sa kapulisan sa miaging adlaw 12:05AM sa kadlawon.
Kahinumduman naaresto si Lidio Gamores Ebol, 46 anyos , residente sa Brgy. Lipuno, Sibuco, ZDN. Halos 13 ka tuig nga nagtago-tago human kini nalutsan ug warrant of arrest niadtong Hunyo 6, 2006 sa kasong Attempted Rape ilawom sa CC no. 616 nga giisyo ni Presiding Judge Oscar Tumarong sa RTC 9th Judicial Region br. 27, Siocon.
-30-
RMN GENSAN- 2 ka patayng lawas sa lalaki, nakaplagan sa lungsod sa Banga
South Cotabato—Nagpadayon ang gihimong Imbistigasyon sa Banga Municipal Police Station sa nahitabong kamatayon sa duha ka mga biktimang nakaplagang patay daplin sa dalan sa may Sitio Paghidaet, Barangay San Vicente banga South Cotabato alas 3:20 sa kabuntagon.
Una nang nakaplagan ang mga biktima sa mga residenti sa lugar kung asa naputos pa ug packing tape ang ulo, ug may igo pinusilan samtang nakagapos pa ang duha ka mga kamot sa mga nasangpit. Basi sa inisyal nga imbistigasyon sa kapulisan nasuta nga ayha nakaplagan ang mga patayng lawas sa mga biktima, nakadungog ug sunod sunod nga buto sa pusil ang mga residenti. Dihang ilang gisuta didto na nakaplagan ang duha ka mga biktima nga nagkadugo ug wala nay kinabuhi. Usa sa mga biktima ang nag sul-ob ug blue nga t-shirt, dark blue nga short ug sky blue nga sapatos samtang nag sul-ob ug itom nga t-shirt, brown nga short ug blue nga tsinelas ang usa pa ka biktima. Sa karon naglusad na ug mas makuting imbistigasyon ang kapulisan kalabutan sa insidenti.
-30-
RMN MALAYBALAY- 4th ID, gisiguro nga manubag ang mga personahe sa naransak nga patrol base sa San Fernando Padayon ang gihimong imbestigasyon sa gitukod nga board of inquiry kalabot sa pagransak sa kanhi rebel returnee sa patrol base sa Kibungkog, San Fernando, Bukidnon.
Sa interview sa RMN Malaybalay ngadto kang 4th Infantry Division spokesperson 1st LT. Tere Ingente gibutyag niini nga pagkahapon human ang mao nga insidente kaniadtong Nobyembre 15, gilayon nga gimando ni MGen. Ronald Villanueva ang pagmugna sa BOI aron imbestigahan ang mao nga panghitabo. Nasayran nga nadala sa mga suspek nga gipangunahan ni Lawless Armed Group leader Aldie Salusad alyas “Butchoy” ang 15 ka high powered firearms nga gilangkuban sa 2 ka R4 riffles; 8-M16 rifles; 1-carbine; 4-garand rifle; 1-Harris Radio, cellphones, uniporme sa sundalo ug combat packbags. Kuyog ni Butchoy ang duha ka akomplis nga CAFGU nga kakonsabo niini nga sila Ruben Subuan ug Malone Dandalan ug walo ka tawo. Gisiguro ni Ingente sa publiko nga mag-atubang sa tukmang silot ang mga personahe sa mao nga patrol base kung mapamatud-an nga nagpasagad sa ilang trabaho. Nasayran nga si Col. Arboleda ang Division Inspector General ang nanguna sa BOI. Base sa statement ni Sgt. Donio, ang assistant patrol base commander, nakasulod sa kampo si Butchoy human nagpa-aron-ingkon nga mutawag sa iyang amahan nga si Benjamin “Nonong” Salusad. Sa pagsulod sa kampo, gilayong gigapos sa duha ka konsabo nga CAFGU si Sgt Donio ug didto nahitabo ang pagdis-armas ug pagkuha sa uban pang klase sa tag-as nga armas. Sa karon wala pay inisyal nga resulta sa board of inquiry.
-30-
RMN DAVAO- CAFGU gipusil-patay Davao City – Naglusad na karon ang Pantukan Municipal Police Station og manhunt operation aron sikupon ang mamumuno nga mipusil patay sa usa ka CAFGU nga nahitabo sa Barangay Napnapan, Lungsod sa Pantukan, ComVal Province pasado 6:00 sa kagabhion.
Biktima mao si Julius Bucaron, 37 anyos, byudo, CAFGU ug nadestino sa 72ndIB CAA Patrol Base nga nakabase sa nasangpit nga barangay. Sa imbistigasyon sa kapulisan, nasayran nga samtang nagtindog sa gawas sa mining tunnel ang biktima kalit kini gihunungan og motor sakay ang armado dayon pusil pila ka higayon ngadto sa CAFGU member. Ang maong mining tunnel gipanag-iyahan sa usa ka Arman Alcano nga nahimutang sa naasoy nga lugar. Ning kasamtangan, dili pa matumbok sa mga otoridad ang rason sa pagpusil patay sa biktima ug dili pa sab masulti sa mga imbestigador kung teroristang CPP-NPA-NDF ba ang miluthang sa biktima.
-30-
RMN BUTUAN- NGCP andam sa pag-abot sa bagyong Samuel Gipangandaman na sa National Grid Corporation of the Philippines (NGCP), ang tagdumala sa nasodnong transmission sa kuryente, ang paghidangat sa bagyong #SamuelPH aron mapaubsan ang epekto niini sa operasyon sa transmission ug sa mga pasilidad.
Lakip sa gihimong preparasyon mao ang pagseguro sa mga kagamitan sa komunikasyon, pag-andam sa mga materyales nga gamiton unya sa pag-ayo sa mahimong madaot nga pasilidad, ug apil na usab niini ang pagpahiluna sa mga linemen personnel diha sa mga pabor nga lugar nga makapadali sa himuong pag-ayo sa apektadong pasilidad.
Kining maong mga lakang ug pamaagi gilatid sa Integrated Disaster Action Plan (IDAP) sa NGCP aron maseguro ang tiunay nga pagpangandam sa kompanya ug sa mga pasilidad niini nga maapektohan sa katalagman.
Ang NGCP aduna usay hiniusang Command Center nga magtutok sa gihimong mga pag-ayo sa pasilidad ug pagpahibalik sa dagan sa kuryente, pagtaho sa mga panghitabo sa Luzon, Visayas, ug Mindanao kon diin nga mga rehiyon nga nakasinati sa kalamidad.
