Pagadian City – Kasong paglapas sa Akta Republika 10591 kun “Comprehensive Firearms and Ammunition Regulation Act” ug Comelec Gun Ban ang gi-atubang sa duha ka alaki human nasakpan nga nagdala-dala og armas sa gawas nga bahin sa Sureball Billiard Hall, sa F.S. Pajares Avenue, Brgy. San Jose ning syudad ala 1:00 kagahapon sa kadlawon.
Sa impormasyon nga gitunol ni PLTCOL ALVIN SAGUBAN, ang hepe sa Pagadian City Police Station nailhan ang mga suspek nga sila si Nestor Rusiana Fuentes, 50-anyos, residente sa Purok Kapalaran, Brgy. Balangasan ug Lou Arvin Remaling Samonte, 46 anyos, lumulupyo sa Purok Sandayong, Brgy. Santo Niño , Pagadian.
Sa inisyal nga imbestigasyon nasayran samtang kamulo sa pagtagay sa Sureball Billiard Hall ang mga nahisgutan kalit nga niabot ang tropa sa SWAT Team sa Sureball Billiard Hall ug nipaila nga sila Police Officers dungan ang palusad sa “Search” sa mga nag-inom sa lugar.
Ang usa sa suspek nga si Nestor Rusiana Fuentes nisulay pagtago sa iyang sling bag apan daling gisita sa SWAT personnel og nakuha sa iyang sling bag ang usa ka unit Caliber .45 pistola nga may usa ka magazine nga gisukipan sa pito ka buhing bala, tulo ka (3) extra magazine sa Calibre 45 nga may tag-pito ka buhing bala.
Samtang ang laing suspek nga si Samonte nga may camouflage sling bag nga gisambilang sa iyang bukton nakuhaan og usa ka granada (MK2).
Ang mga suspek pakyas sa pagpakita sa ilang legal nga dokumento rason nga gipaslak na karon sa Pagadian City Police Station lock-up cell.
