Davao City – Usa ang deklaradong patay samtang lain ang kritikal human gipamusil sa managlahing lugar sa Davao del Norte sa wala mailhing mga suspetsado kagahapong adlawa, Pebrero 6, 2020.
Sa report sa PRO-XI, unang biktima naila nga si Jhonmark Racaza, 18 anyos, laborer sa SUMIFRU Philippines under United Laborers Multipurpose Cooperative (ULMC), ug residente sa P-10, Sitio Casigid, Barangay San Roque, New Corella, Davao del Norte.
Nasayran nga alas 8:20 sa buntag nangharvest og saging ang biktima aron ihatod sa plantasyon sa dihang dunay kalit miduol nga wala mailhing lalaki kinsa nakasuot og mask ug bull cap dayon pusil sa biktima sa upat nga higayon nga miresulta sa iyang hinanaling kamatayon dayon ikyas sa suspek.
Migula sa imbestigasyon sa New Corella MPS nga personal nga bangi ang motibo sa sa maong insidente samtang naglusad na og follow up investigation ang kapulisan alang sa pag ila sa maong mamumuno.
Sa susamang adlaw alas 6:50 sa gabii, gipusil ang usa ka Rodrigo Capuyan, 50 anyos, minero sa wala mailhing suspetsado samtang kini nagbaktas paingon sa ilang balay sa Jade Street, Black 6, Purok Kalayaan, Sison Subdivision, Barangay Magugpo South, Tagum City dayon sibat sa wala matinong direksyon.
Nadala pa mirespondeng CDRRMO rescue team sa Davao Regional Medical Center ang biktima aron tambalan ug karon anaa sa kritikal nga kondisyon.
Motibo padayon pang ginasuta sa awtoridad ingon man follow up investigation sa identity sa suspetsado.
RadyoMaN Jason Amisola
