Pagadian City, Zamboanga del Sur – Nahanaw nga daw bula ang duha ka mga buhatan sa Kabus Padatuon kon KAPA Community Ministry International dinhi sa probinsya sa Zamboanga del Sur pila ka adlaw human gimando ni Pangulong Rodrigo Duterte ang pagpasira niini ka-uban ang uban pang mga investment schemes nga nagtunhay sa Mindanao.
Sa gihimong pagsusi sa RMN-Pagadian sa ilang buhatan sa Zone 10, Brgy. Tiguma ning syudad sa Pagadian, wala na ang ilang gisab-it nga tarpaulin sa gawas apil na ang mga dokumentong ilang gipilit og wala na usab ang presensya sa ilang mga miyembro nga kanhi puno-puno bisan og sayo pa lang sa buntag.
Samtang gibiyaan na usab sa ilang lider ang usa pa nila ka sangang buhatan sa Purok Bagong Silang, Brgy. Lantian, Labangan diin bangko ug electric fan lang ang naabtan sa DXPR Newsteam.
Sa impormasyon nga gitunol sa mga residente sa lugar gi-ablihan ang buhatan sa KAPA sa Labangan niadtong petsa 7 ning bulan sa hunyo ug gidagsa kini sa bagang miyembro ug kadaghanan niini gikan sa syudad sa Pagadian.
Wala magdugay ang operasyon sa KAPA sa nahisgutang lugar dihang gisita sa kapulisan sa Labangan rason nga nibiya kini human ang 48 oras nila nga pagpangdawat mga donations.
