Davao City – Nasikop sa Philippine Drug Enforcement Agency (PDEA-XI) ang duha ka drug pusher sa gilusad nga buy bust operation alas 4:30 sa hapon didto Brgy. New Visayas siyudad sa Panabo, Davao del Norte.
Unang naaresto ang usa ka Junfel Hagunos, 41 anyos, residente sa Brgy. Gredu, Panabo City ug nakuha gikan sa iyang possession ang duha ka gagmay’ng sachet nga gituohang shabu nga dunay estimated street value nga 1,000 ka pesos lakip ang mga drug paraphernalia ug buy bust money.
Samtang didto sa dakbayan Digos partikular sa Roxas Ext., nadakpan ang usa pa ka drug pusher nga naila sa pangalang Aldwin Nemaria, 40 anyos, usa ka collector, nakumpiskahan usab og duha ka sachet nga shabu, mga drug paraphernalia lakip ang buy bust money nga 500 pesos.
Ang duha ka dinakpan balhog na sa detention cell sa PDEA-XI ug gihikay na ang kasong kalapasan sa Republic Act 9165 kun Comprehensive Dangerous Drugs Act of 2002.
Sumala ni PDEA-XI Spokesperson Noli Nephi Dimaandal nga sa bulan sa Disyembre duha na ka drug pushers ang nadakpan sa managlahi nga buy bust operation.
RadyoMaN Don Pulayao
