General Santos City—Sunod sunod nga mireklamo sa buhatan sa Police Station 1 ang duha ka mga estudyante human nga gitulis ug gikawatan ug motorsiklo sa managlahing lugar, ilawom sa AOR sa Police Station 1.
Unang mireklamo sa Police Station 1 ang usa ka Alliana Sevilla, 18 anyos, estudyante human kining gitulis sa duha ka mga suspek.
Subay sa sumbong niini iyang gibutyag nga alas 9:27 ang takna sa gabie, siya naglakaw pauli sa ilang Balay sa may barangay East, apan samtang siya anaa palang sa may Roxas corner Rambutan Street, Barangay East, kalit siyang giduolan sa duha ka mga suspek nga sakay sa Motorsiklo dayon gilabni ang iyang Cellphone.
Paspas nga misibat ang mga suspek human sa insidente, samtang ang biktima igo nalang sa pagpatala sa buhatan sa Police Station 1.
Samtang mipatala usab sa buhatan sa kapulisan ang biktimang si Anthony Sarboso, legal age, estudyante ug residenti sa Barangay San Isidro, Gensan human kining gikawatan ug motorsiklo sa wala mailhing suspek.
Nasayran nga igo rang giparking atubangan sa usa ka estableshemento nga nahimutang sa Recto Corner Tieza Street ang motorsiklo sa biktima nga usa ka Honda 125 kolor combination sa pula ug puti.
Pagbalik niini sa lugar aron unta kuhaon ang iyang motorsiklo, wagtang na kini. Iya lang gipangita apan wala nagyud niya nakit-an maonga midangop nalang kini sa buhatan sa kapulisan.
Sa karon nagpadayon pa ang gihimong imbistigasyon sa kapulisan kalabutan sa kaong insidenti.
