*General Santos City— Gikumpirma ni Col. Adonis Bajao, Commanding Officer sa 1002nd brigade nga adunay duha ka mga financier sa grupo ni Abu Toraype sa teroristang Bangsamoro Islamic Freedom Fighters kon BIFF ang naaresto dinhi sa dakbayan sa Gensan.*
*Wala una niya gihinganlan ang mga nasangpit kung asa pagpaklaro niya nga gawas sa maong mga dinakpan, aduna pay uban ang mga nagalihukan. Sumala niya nga dili pa nila makumpirma kung aduna nay ginahimong plano, apan dili malikayan nga aduna nay mga lihok nga ginahimo sama sa paghatag ug pondo ngadto sa teroristang grupo.*
*Dugang pamahayag ni Col. Bajao nga ang mga nasangpit nga dinakpan ang anaa sa pinansyal nga aspeto sa BIFF ug wala una nila kini gipa-atubang sa publiko gumikan padayon man ang ginahimong imbestigasyon.*
*Subay matud pa sa inisyal nga impromasyon, gikan sa ubang nasud ang pondo nga ginakuha sa duha nga dinakpan ug dayon kini maoy ginadala sa Central Mindanao.*
*Kung asa dako matud pa ang posibilidad nga kini maoy hinungdan nga nagpabilin gihapon ang mga pagpamomba sa Maguindanao ug ubang parte sa Central Mindanao.*
*Kalabot niini, gibutyag ni Col. Bajao nga ang dakbayan sa Gensan ug ubang lugar sakop sa 1002nd brigade ang nagpabiling anaa sa alert level 3.*
*Saysay niya nga wala matud pa nagpa-ubos sa pagbantay sa siguridad gumikan aminado siya nga anaa gyud ang hulga sa siguridad sa mga dagkong syudad hilabina na sa mga lugar nga lambo ang ekonomi uya ug turismo.*
