Nahidangat bag-uhay lang sa probinsya sa Sarangani partikularminte sa Barangay Mabay, Maitum ang langyaw nga grupo gitawag nga RPRCC kon Resources for Philippine Rural Communities Corporation gipangunahan sa ilang president-founder nga si Ms. Cora Carter, usa ka Filipino-American naka-basi sa nasud America.
Segun ni Toto Terando, ang program manager sa Sulong Tribu program, dili bag-o ang RPRCC tungod nagsugod sila sa pag-ayuda sa IP Community sa Sarangani Province gikan pa tuig 2016. Wala kini laing katuyuan kundili suportahan ang pagpaningkamot ni Governor Steve Chiongbian Solon nga masiguro nga adunay makaon ang matag pamilya pinaagi sa natural farming. Gawas sa pagpanghatag og kagamitan pang-uma og mga semilya sa gulayon, gapanghatag usab silag mga hayop, sama sa karabaw, kanding og rabbit.
Samtang, hilabihan pud ang kalipay sa mga lumad sa Sitio Green Valley, Barangay Nalus, Kiamba og Sitio Laguinan, Barangay Lutay, Malungon tungod kay hayag na ilang panimalay panahon sa kagab-ihon gumikan nindot nga mga solar panel ang libreng gipanghatag ngadto sa 175 kabuok balay gikan sa worldwide non-profit organization naka-basi sa nasud Germany gitawag nga Stiftung Solar Energy Foundation.
Walay laing katuyuan ang Stiftung Solar Energy Foundation nga tuig 2016 pa nag-ayuda sa DepEd Sarangani, kundili nga tabangan ang mga estudyanteng lumad nga mutaas ang oras sa ilang pagtuon pinaagi sa mga suga. Good news tungod kay gi-anunsyo sa international coffee chain nga The Coffee Bean and Tea Leaf, usa sa mga donor, nga ilang paliton ang maaning kape gikan sa Laguinan, Lutay tungod kay ilang nahibal-an nga abunda sa produksyon sa kapeng Arabica og Robusta ang maong sityo sa Malungon.
