Gin-relieve ni PRO-6 Director Brigader General Rene Pamuspusan ang duha ka junior commanders bangud sa pagkadakop sang ila tinawo nga naglapas sa liquor ban.
Ang mga ginrelieve ni Pamuspusan amo sanday Police Lt. George Canio bilang Platoon Leader sang 2nd mobile platoon sang 2nd Iloilo Provincial Mobile Force Company nga nakabase sa barangay Cabaguhan, Batad, Iloilo kag gin-reassign sa Regional Personnel Holding and Accounting Unit ukon RPHAU sa Kampo Delgado.
Subong man si Police Captain Victor Bacinilio bilang supervisor sang RPHAU kag ginsaylo sa Regional Headquarters Support Unit epektibo sini nga Mayo 22.
Una diri, ginpaandaman ni Pamuspusan ang mga unit commanders nga siguruhon ang pagdispilina sa ila mga tinawo kay kon indi, iga-relieve sila pinaagi sa one strike policy.
Sanday Canio kag Bacinilio ang pareho nga direct supervisors sang mga pulis nga nadakpan sa checkpoint sa Lemery kag Guimbal nga may mga dala nga kinarton sang makahulubog nga ilimnon.
