General Santos City—duha ka sunod sunod nga pagpanunggab nahitabo gawas sa Explore Bar nga nahimutang sa Lagao-Bula Road Gensan.
Unang nadunggaban ang biktimang si Gabriel Diana, 19, residenti sa Barangay Lagao Gensan.
Alas 4:00 ang takna sa kabuntagon, Domingo, August 6, 2017, dihang nadunggaban ang nahisgutang biktima sa sa grupo sa mga batan-ong lambigit sa rambol sa gawas sa Explore bar.
Subay sa inisyal nga imbistigasyon sa Police Station 3 sa biktima, siya gipasanginlan sa mga suspek nga miyembro sa ilang kalabang grupo maong siya gidunggab. Apan gihingusgan sa biktima nga siya naatlan lang nga anaa gawas sa Explore bar dihang nahitabo ang rambol.
Nakaangkon ang biktima ug samad sa iyang kamot nga bahin kansa gidala gilayon sa Dr. Jorge Hospital human sa insidenti, samtang mga suspek nag iyahay ug sibat human sa rambol.
Ikaduhang nadunggaban nailhang si Angelbert Vellaspin, 22, residenti sa Prk. Maligaya, Zone 1, Barangay Buayan, Gensan. Alas 5:15 ang takna sa buntag Domingo, dihang giatngan sa wala pa mailhing suspek ang nahisgutang biktima, gawas gihapon sa explore bar.
Siya gidunggab unom ka higayon igo sa managlahing parti sa lawas. Paspas nga misibat ang suspek sa wala sayring lugar samtang ang biktima, gidala gilayon sa ospital. Gituohang nga nakabingkil sa biktima ang nahisgutang suspek sulod sa Explore bar maong siya giatngan paggawas niini sa maong balay imnanan.
Sa karon padayon pa ang ginahimong imbistigasyon sa Police Station 3 kalabutan sa insidenti.
