Margosatubig, Zamboanga del Sur – Nabolabog ang selebrasyon sa adlaw nga natawhan dihang dunay kalit nga namusil taliwala sa party didto sa Purok Yellow Bell 1, Barangay Poblacion, Margosatubig, Zamboanga del Sur.
Dead on arrival sa ospital ang biktima nga si Junel Langomes Balan, 26 -anyos, ulitawo nga usa ka electrician samtang samaran usab ang kauban niini nga si Pedro Andujar Maloloy-on Jr., 52 -anyos, sakop sa CAFGU, pulos mulupyo sa naasoy nga dapit.
Sa inisyal nga imbestigasyon samtang nagselebrar sa birthday party ug nag-inom ang mga biktima sa mismong balay ni Maloloy-on kalit nga niabot ang wala maila nga mamumuno og largong gipusil sa liog si Balan ug lakip nga gipusil ang nagtag-iya sa balay nag si Maloloy-on.
Human sa pagpamusil daling nisibat ang suspek paingon sa Sitio Marissa, Barangay Poblacion, Margosatubig, samtang ang mga biktima largong gidala sa Margosatubig Regional Hospital apan nakbasan sa kinabuhi si Balan ug padayon usab nga gitambalan sa doctor si Maloloy-on.
Naglusad na og hot pursuit operation ang kapulisan alang sa pag-ila ug pagdakop sa mga suspetsado.
Hangtud ning taknaa wala pay naestablisar nga motibo ang mga imbestigador sa Margosatubig PNP.
