Isa ang patay kag isa ang pilason matapos makuryente samtang nagatakod sang wi-fi sa Barangay Buga, Leon, Iloilo mga alas 3:40 kahapon sang hapon.
Ginkilala ang napatay nga si John Rey Camince, 20 anyos , pumuluyo sang nasambit nga barangay samtang ang napilasan ginkilala nga si John Lloyd Cabarillos, 22 anyos sang amo man nga lugar.
Sa imbestigasyon sang Leon PNP, ginpahayag ni Police Lt. Sammy Gasataya, OIC sang Leon Police station nga natabu ang insidente samtang naga-install sang wi-fi sa isa ka balay ang mga biktima sang makauyat sang live wire si Camince kabangdanan nga nagtabog ini kag nadalahig man nga nakuryente si Cabarillos nga nakaangkon sang paso sa iya nawala nga tiil.
Dali-dali nga gindala sa Aleosan District Hospital ang mga biktima apang gindeklarar nga dead on arrival si Camince samtang yara na sa estable nga kondisyon si Cabarillos.
