Pagadian City – Gapa-alim pa karon sa ospital ang duha ka lalaki human kining gipamusil alas 11:55 martes sa gabii sa Laja Building, Ariosa Street corner Pulmones Street, Purok Tulingan, Brgy. Santiago ning syudad sa Pagadian.
Giila ang mga biktima nga sila si Amir Mohammad, 25-anyos, ulitawo, dishwasher sa carenderia ug Radzmer Alawi, 25-anyos, ulitawo, usa ka aborer ug temporaryo nga nagpuyo sa Laja Building, Santiago District, Pagadian City.
Sa inisyal nga imbestigasyon nasayran samtang naglingkod ang mga biktima sa gawas nga bahin sa moang building kalit nga niabot ang riding in tandem nga mga suspek ug ang sakay nga armado nangutana ngadto sa mga biktima kun duna bay gikulata sa lugar dungan ang paghulbot sa dala nga calibre 45 nga pistola.
Daling nisibat ang mga suspek paingon sa wala matino nga lugar human ang pagpamusil samtang nakuha sa dapit nahitabuan ang tulo ka basiyo sa calibre 45.
Ang biktimang si Amir Mohammad naigo sa iyang paa samtang si Radzmer Alawi nakahi-agum og duha ka samad pinusilan sa iyang wala nga aping ug sa iyang liog nga karon gitambalan sa pribado nga ospital.
