Duha ka mga construction workers, nadakpan sa drug buy-bust operation sa siyudad sa Malaybalay

Wala na makaikyas pa sa kamot sa mga otoridad ang duha ka mga construction workers nga ang kinsa nadakpan sa gilusad nga drug buy-bust operation sa mga kapulisan pasado alas 11:47 sa udto kagahapon didto sa Purok-4, Barangay Sumpong, Malaybalay City, Bukidnon.

Ang mga suspek gipang-ila nga silang Frengel Rayos, 30 anyos, adunay kapuyo, ug si Alvin Balangyao, 37 anyos, ulitawo, ug pulos residente sa Purok-1, Barangay Sumpong, Malaybalay City, Bukidnon.

Narekober gikan sa mga suspek ang buy-bust item nga usa ka pakete sa gituohang drogang shabu nga mutimbang og 0.08 gramos ug gibana-bana nga mukantidad og P544.00.

Samtang, laing 10 ka mga pakete sa gituohang drogang shabu ang nakompiska sa mga otoridad nga gibana-bana nga mutimbang og 2.46 gramos ug mukantidad og P16,728.00 lakip ang usa ka sachet sa gituohang illegal nga dahon sa Marijuana nga mukantidad og P99.60.

Narekober usab ang usa ka P500 bill, usa ka unit sa Samsung keypad nga cellphone, ug usa ka Yamaha YBR 125 nga single motor.

Gidala karon sa Malaybalay City Police Station ang mga nadakpang suspek lakip ang mga nakompiskang ebidensya alang sa tokmang disposasyon ug layong iturn-over sa PNP Provincial Forensic Unit, Malaybalay City alang sa eksiminasyon.

Samtang mag-atubang sa paglapas sa RA 9165 kon Comprehensive Dangerous Drugs Act of 2002 ang mga dinakpang suspetsado.