Duha ka mga ginasiling ‘peke ‘ nga dental clinic sa Bacolod ginraid sang NBI

603

BACOLOD CITY – Yara na karon sa kustodiya sang National Bureau of Investigation (NBI) ang gindakup nga duha ka mga nagpakilala nga dentista matapos ginpatigayon ang separado nga raid sa ila clinic sa Brgy. Alijis kag sa atubang sang Cyber Center sa dalan Hernaez, Bacolod City.

Gindakup sang NBI sanday Eremilo Barrios, legal ang edad kag Irish Evangelista Hechanova, 36 anyos matapos gin-allege nga ini sila ang naga-operate sang amo nga mga dental clinic nga wala sang nagakaigo nga lisensya.

Matapos nga nadakpan, gilayon nga ginpaidalum sa inquest proceedings ang duha ka mga nadakpan sa City Prosecutors Office sini nga aga.

Madumduman nga kahapon, gindakup si Barrios pinaagi sa pag–serbe sang search warrant nga gin-issue ni Hon. Judge Estefanio Libutan Jr. bangud sa kaso nga violation sang RA 9484 ukon Philippine Dental Act of 2007.

Suno kay NBI Bacolod In-Charge Atty. Renoir Baldovino nga gin-raid ang clinic ni Barrios base sa sulat nga ginpadala sang Philippine Dental Association, Negros Occidental Chapter upod ang certification halin sa Professional Regulations Commission (PRC).

Nahibaluan nga wala nalakip ang ngalan ni Barrios kag ni Hechanova sa master list sang mga tawo nga authorized nga mag-practice sang dentistry sa Pilipinas./DYHB NEWSROOM

Facebook Comments