Tukuran, Zamboanga del Sur – Wala na makaipsot pa sa mga kamot sa otoridad ang duha ka mga Most Wanted Person human sa gihingusgan nga police operation.
Nagtigom ug pwersa ang otoridad lakip na ang kapulisan sa Tukuran ug Dinas sa pagsilbi sa arrest warrant batok sa duha ka mga pinangita sa balaod kagahapon sa kadlawon didto Barangay Bayaw, Tukuran, Zamboanga del Sur.
Ang nasangpit nga operasyon ang miresulta sa malampusong pagkasikop sa duha ka Most Wanted Persons nga nailang si GAMPONG YUNOS PAGLAS (Top 5 Regional Most Wanted Person), 48 anyos, ug JUHAIR GUIAPAL NANDING, 39 anyos, minyo, pulos mga mag-uuma ug residente sa East Migpulao, Dinas, ning probinsya.
Gidakop ang duha pinasikad sa gahum sa Warrant of Arrest alang sa kasong Frustrated Murder ug Attempted Murder, nga gipagawas ni Judge RUBEN B BANCE, ang Presiding Judge, Regional Trial Court, Branch 29, San Miguel, Zamboanga del Sur kaniadtong October 03, 2017 .
Walay pyansa nga girekomenda ang Korte bugti sa temporaryong kagawasan sa mga dinakpan.
Ang duha ka mga dinakpan ang gidala na sa Camp Maj. Reginaldo C Abelon, Lumbia District, Pagadian City alang sa dokumentasyon ug tukmang disposisyon.
