Ivisan, Capiz – Arestado ang duha ka mga persona nga nagagamit sang illegal nga druga mga alas 11 sang gab-i sa isa ka resort nga nahamtang sa Brgy Ilaya-Ivisan(Yabton), Ivisan, Capiz.
Ginkilala ang mga suspek nga amu sanday John Rodney Obuyes, 32- anyos sang Brgy Milibili, Roxas City kag upod sini nga si Kristel Kaye Abellavito y Delcano, 29-anyos ang pang-edaron sang Brgy Balatucan, Panit-an, Capiz.
Nahibaluan nga nag-check in lamang sa nasambitan nga resort ang amo nga mga persona.
Ginsiling sang hepe sang Ivisan PNP nga si Police Captain Leomendo Tayupon, nadakpan ang amo nga mga persona matapos nga aksidente nga nakit-an sang billboy ang ginahimo sang mga ini samtang bukas ang pwertahan sang hulot nga ila gin-okupahan.
Madasig ang mga ini nga nagpakig-angut sa mga kapulisan kabangdanan sang pagkadakop sa mga suspek sa akto.
Narekober sa mga ini ang folded nga aluminum foil, improvised tooter, plastic sachet nga gina-alegar may shabu residue kag lighter.
Pasakaan sang kaso nga paglapas sa Section 11, 12 kag 15 sang RA 9165 ukon Comprehensive Dangerous Drugs Act of 2002 ang nasambitan nga mga persona.
