Tapaz, Capiz- Arestado ang duha ka mga persona nga nagabaligya sang armasluthang pinaagi sa entrapment operation alas 11:15 sang aga sa Sitio Jimenez, Brgy. San Miguel Ilaya, Tapaz, Capiz.
Ginkilala ang mga suspek nga amu sanday Leopoldo Cabayao Latumbo sang Calinog Iloilo kag Richard Jarana Palma nga residente sang Bingawan, Iloilo.
Antes sini, isa ka test buy ang ginpatigayon sang mga katapo sang CIDG-Capiz agud nga makumpirmar kun positibo nga nagabaligya ang mga ini sang armasluthang.
Natigayon nga marekober sa mga suspek ang isa ka unit sang caliber .45 pistol Colt government model, isa ka magazine kag duha ka bala sang .45 caliber pistol.
Maluwas diri, narekober man sa paghinakop sang mga ini ang isa ka unit sang .22 caliber Smith and Wesson revolver, apat ka mga bala, duha ka patalom, isa ka unit sang hand-held radio kag motorsiklo.
Ang nasambitan nga mga persona ang magapangatubang sang kaso nga paglapas sa RA 10591 ukon Comprehensive Firearms and Ammunition Regulation Act kag P.D. 9 as amended by Batas Pambansa 6.
