Dao, Capiz – Pilason ang duha ka mga trabahante sa talyer sa Sitio Garison Brgy Ilas Norte, Dao, Capiz matapos ang mga ini ang ginpangluthang alas 10:30 sang gab-i.
Ginkilala ang mga biktima kanday Ryan Lajo, 31- anyos sang Centro, Dao, Capiz nga nag-angkon sang apat ka mga kapilasan sa lawas samtang nasalabat man ang isa pa ka biktima nga nakilala kay Wilmer Degala, 22-anyos sang nasambitan nga barangay.
Stable naman ang kondisyon ni Ryan Lajo nga sa subong ang yara sa Saint Anthony College Hospital kag natalana nga paga- operahan samtang kaupdanan sini nga si Wilmer Degala ang ginpahanugotan naman sang doktor nga makaguha.
Suno sa imbestigasyon sang kapulisan, bag-o lamang tapos sang inum ang mga biktima kaupod ang pamilya sang mga ini sang gulpi lamang nga nag-abot ang suspek nga si Rene Magbanua, 37- anyos sang Brgy Salgan Maayon.
May dala ini nga pusil kag insigida nga ginluthang ang mga biktima.
Wala pa matumod sang mga otoridad ang sahe sang pusil nga gingamit sang suspek sa krimen makaligad nga insigida nagpalagyo matapos ang insidente.
Suno kay Corporal Aguiling sang Dao PNP, mga alas 8:20 sang gab-i antes ang insidente nakabais pa sang biktima ang utod sang suspek.
