Photo credit: NBI Iligan District Office
Patay ang duha ka mga gituohang sakop sa kidnap-for-ransom group dihang na-engkwentro niini ang mga operatiba sa National Bureau of Investigation Iligan District Office (NBI ILDO) ug sa Anti Kidnapping Group (AKG) Lanao del Norte, hapon niadtong Biyernes, Marso 15, sa Barangay Bagumbayan sa lungsod sa Kauswagan, Lanao del Norte.
Giila ni NBI Special Investigator Joey Robert Ajero, officer-in-charge sa NBI ILDO, ang duha nga sila si Zainal Wahab Onding, 31 anyos, residente sa Lower Dansalan, Marawi City ug Naipodin Hosain, 23, residente sa Barangay Bualan, Wato-Balindong, Lanao del Sur.
Ang maong joint operation sa NBI ILDO, AKG Lanao del Norte ug sa Iligan City Police Office (ICPO) gihimo human mangayo og tabang ang usa ka biktima sa pagpangidnap, aron mabawi ang iyang sakyanan nga nga gipalukat og 70,000 pesos.
Una nang naghatag og 50,000 pesos ang biktima aron siya buhian sa mga nangidnap kaniya niadtong Marso 10 gikan sa Marawi City.
Gisuta pa sa AKG kung unsa nga grupo ang maong mga suspek tungod kay, matud pa ni Chief Inspector Gemma Corbita, head sa AKG Lanao del Norte, wala kini sila sa ilang police rogue gallery.
Gipangita na usab ang mga kauban sa duha nga naka-ikyas atol sa pinusilay niadtong Biyernes.
