Sarangani Province–Duha ka motorsiklo ang gianod sa tubig baha sa Malandag, Malungon, Sarangani province alas 2:00 kaganinang hapon human mitaas ang lebel sa tubig sa Tinagacan river duol sa upper Lamcanal.
Sumala ni Jessie Dela cruz, action officer sa Municipal disaster Risk reduction ang management Office sa Malungon nga gawas sa motorsiklong naanod adunay tulo ka mga bata ang natrap sa usa ka panimalay apan malampuson man nga narescue.
Gikumperma usab niini nga walay naanod nga balay gawas lang sa duha ka mga motorsiklo.
Gipaklaro usab ni Dela cruz nga buntag palang kaganina dihang nagpagawas na ug warning si Malungon Mayor Atty. Tessa Constantino ngadto sa katawhan nga bantayan ang posibleng pagkusog sa ulan nga moresulta sa pagbaha.
Adunay mga mihikling nga mga residenti nga nagpuyo duol sa sapa apan dunay pipila nga nagpabilin mao nga naabtan ug baha.Sumala ni dela Cruz nga bahaunon gyud ang Tinagakan river hilabi na kung mubundak ang makusog nga pag-ulan.
Samtang nanawagan usab si Dela Cruz sa katawhan sa malungon nga sundon ang ilang mga advisory aron nga malikayan nga mapagan sa kalamidad hinabi na karon nga nagabundak ang makusog nga ulan sa ilang lugar.
