Patay ang usa ka backrider sa nahitabong panagbangga sa dalan sa duha ka mga motorsiklo sa National Secondary Road, Purok 2, Brgy. Managok sakop ning dakbayan sa Malaybalay.
Nalambigit niini ang usa ka Honda Bravo 100 nga motorsiklo kolor itom nga walay plaka nga gimaniho ni Gideon Singsing, 50 anyos, menyo ug lumuluypo sa Purok 6B, Sitio Mahayahay, Brgy. Aglayan ning dakbayan kauban ang angkas niining asawa.
Matud sa taho sa kapulisan nga naka-engkwentro niini ang usa ka Honda XRM125 kolor itom nga gimaneho ni Dionesio Rayos, 56 anyos menyo, ug nagpuyo sa nasangpit nga dapit.
Sa gihimong imbistigasyon sa kapolisan , alas 8:10 ang takna sa buntag nagdagan ang duha ka motorsiklo sa susamang direksyon apan pag-abot sa maong dapit, nag-overtake ang usa nga miresulta sa pagkalagpot sa duha ka mga angkas sa motorsiklo.
Naka-angkon ug samad ug bun-og ang mga driver sa motorsiklo ug ang tagsa tagsa nila ka mga back-riders.
Dali nga gidala sa Bukidnon Provincial Medical Center apan ang usa ka angkas nga nailang si Janita Singsing ang gideklarang dead on arrival. (Reno Taguibulusan)
