Davao City – Padayon ang ginahimong hot pursuit operation karon sa 10th Infantry Division Philippine Army human ang nahitabong engkwentro sa Sitio Lanan, Brgy. Goma, Digos City, Davao Del Sur alas 7:15 kaganinang buntag, April 5, 2019 diin kini miresulta sa pagkamatay sa duha ka mga miyembro sa New People’s Army kun NPA.
Sa pakighinabi sa DXDC RMN Davao kay 10th ID spokesperson Capt. Jerry Lamosao, nagkaengkwentro ang tropa sa 39th Infantry Battalion ug sa wala matinong ihap sa Guerilla Front 51, SMRC sa nasangpit nga lugar.
Matud pa nakadawat og report ang 39th IB nga adunay presensya sa rebeldeng grupo sa area ug posibleng muhimo og pagpangrecruit ug pagpangilkil busa dali kini giadtuan sa kasundaluhan ug didto miulbo ang 45 minuto nga binakbakay sa duha ka grupo.
Subay sa report, duha ka NPA ang napatay, usa ka high high powered firearm ang nakuha samtang walay natala nga casualty sa kasundaluhan.
Sa karon, gi-turn over na sa kasundaluhan ang mga patayng lawas sa NPA sa nasangpit nga brgy.
“Gani ang tropa karon, adunay padayon sa intensive sa information gathering at the same time ang patayng lawas sa duha ka NPA ato ng giturnover sa barangay ug ato ng gitabangan nga mapahiluna og tarong ang patayng lawas sa NPA,” segun ni Lamosao.
RadyoMaN Renz Barbarona
