Duha ka pamilya nga dugay nang dunay rido sa Lanao del Sur nagkasinabot nga undangon na ang ilang away

27

Pinaagi sa pagtabang sa 82nd Infantry Battalion, Philippine Army, gitapos kagahapon sa duha ka pamilya sa Lanao del Sur ang ilang rido nga milungtad sa dugay nang mga katuigan.

Pasado alas-9:00 kagahapon dihang nag-abot ang duha ka pamilya sa munisipyo sa lungsod sa Kapai aron tuldukan ang ilang away nga mikalas na og mga kinabuhi.
Matud pa ni LCol. Rafman Altre, commander sa 82nd Battalion, kauban nila ang local government unit (LGU) sa Kapai sa paningkamot nga maglamano ug kalimtan na ang ilang rido.
Dungan sa maong panagsabot o settlement ang pag-surrender sa duha ka pamilya sa upat ka mga armas aron ipakita nga desidido silang undangon na ang ilang away.
Miingon si Col. Jose Maria Cuerpo, commander sa 103rd Infantry Brigade, nga dili lamang pag-gukod sa mga rebelde ug terorista ang gihimo sa Army sa Lanao del Sur apan lakip usab niini mao ang pag-akto nga peace-keepers ug peace-makers sa lalawigan.
Gidayeg ni Cuerpo ang duha ka pamilya sa ilang desisyon nga tapuson na ang ilang away. (Divina M. Suson, Lanao del Sur, May 28)
PHOTO COURTESY: 1st Division Public Affairs Office


Facebook Comments