Ginluthang ang duha ka mga persona, samtang nagalakat sa Sitio Upper Bleboy, Barangay Talisay, Lake Sebu, South Cotabato pasado alas 3:00 sang hapon kahapon nga adlaw Oktubre 15, 2020.
Ginkilala ang mga biktima nga sanday Evelyn Esgrina Ecorido, 42-anyos kag Johanis Marcellana Concolis, 50 -anyos, laborer kag pareho residente sang nasambit nga lugar.
Base sa imbestigasyon sang Lake Sebu MPS ang duha ang papauli na kag pag-abot sa atubang sang balay sang suspek nga si Ariel Escorido Mozones, 37-anyos, mangunguma kag residente man sang nasambit nga lugar sang hinali na lang nga gintiro sini ang mga biktima gamit ang single shot homemade 12 gauge firearm.
Una nga gintiro sang suspek si Evelyn Esgrina Ecorido nga naigo sa iya tuo nga tiil kag sunod sini nga gintiro si Johanis Marcellana Concolis nga naigo naman sa tyan.
Gilayon naman nga nagdalagan ang mga biktma agud nga mangayo sang bulig sa mga kaingod sini, apang ang isa ka suspek nga si John Escorido Pingoy, 39 –anyos, single, mangnguma kag residente man sang nasambit nga lugar ang nagtiro man kuntani kay Johanis Marcellana Concolis apang maswerte nga wala naman naglupok..
Gilayon naman nga gindala sa ospital ang mga biktima.
Samtang ang suspek nga si Ariel Escorido Mozones ang nagsurender sa responding team sang Lake Sebu MPS lakip na ang armas luthang sini kag ang suspek naman nga si John Escorido Pingoy ang nagpalagyo sa wala mahibaluan nga direksyon.
Personal grudge ang motibo sa nasambit nga insidente.
