General Santos City–Gikumperma ni Police Major Rexor Canoy ang tigpamaba sa General Santos City Police Office nga aduna nay duha ka mga estasyon sa kapulisan ang gi-ilisan ug bag-ong mga hepe.
Nilingkod na matud pa sa ilahang mga opisina silang Police Major Basher Alindo ang bag-ong hepe sa Police Station 8 samtang si Police Major Ruelito Lumiguid ang milingkod isip labaw sa Police Station 3.
Lakip matud pa ang duha ka mga COP nga gimanduan ni Police Col. Aden Lagradante nga gilayong sulbaron ang mga nahitabong pagpamusil sa ilahang mga Area Of Responsibility human sa sunod-sunod ang natalang pagpamusil sa syudad.
Dugang pa ni Major Canoy nga sa kasamtangan padayon ang pagreview ni Col. Lagradante sa performance sa mga Chief Of Police sa syudad aron nga sayron kung aduna paba kiniy anagay nga ilisan.
Gipaklaro usab ni Canoy nga sa usa ka dako nga syudad gikinahanglan gayud nga usa ka Police Major ang mulingkod sa mga Police Station hinungdan nga hinay-hinay usab nga gina-ilisan ni Col. Lagradante ang mga Chief Of Police nga dili haum ang ranko sa ilahang posisyon.
Gikabutyag usab niini nga sila sa GSCPO ang nagtinabangay aron nga mabantayan ang syudad ug magpabilin ang kahapsay ug kalinaw sa dakbayan.(Dave Silagan)
