Dead-on-the spot ang duha ka lalaki human nga mibangga ang gisakyang motorsiklo niini ngadto sa usa ka truck didto sa Diversion Road, Purok-23, Santa Cruz, Barangay Casisang, Malaybalay City adtong milabayng Lunes.
Giila ang mga nakabsan sa kinabuhi nga sila Jerick Cacay, 28 anyos, ulitawo ug si John Bert Salintao, 24 anyos, ulitawo ug susamang mulopyo sa Purok-4, Brgy. Kalasungay, Malaybalay City.
Sumala sa taho sa kapulisan, gadagan ang maong truck padulong sa Brgy. Aglayan ning dakbayan sa dihang pag-abot sa may kurbada nga bahin sa maong dalan mibangga sa atubangan nga bahin sa maong truck ang usa Kawasaki nga motorsiklo nga gisakyan sa mga biktima.
Gumikan sa kakusog sa impak, napaslak sa ilawom nga bahin sa maong truck ang duha hinungdan sa hinanaling kamatayon sa mga biktima.
Samtang hugot nga panghimangno karon sa mga motorista nga magbantay gayud sa kadalanan ug musunod sa balaod trapiko aron mahilikay sa disgrasya.
