Duha ka subject person, dakop sa buy bust operation sa Barangay I, Roxas City!

120

Roxas City, Capiz – Dakop ang duha ka mga persona sa ginkasa nga drug buy bust operation sang mga katapo sang PDEA- Capiz kag Station Drug Enforcement Team sang Roxas City PNP alas 11:35 sang aga sa Aguinaldo Street Barangay 1, Roxas City. Nakilala ang subject person kay Benedict Cleofas y Mabasa, residente sang nasambitan nga lugar kag Rommel Aldea y Barte, 35-anyos sang Malipayon Village, Barangay Tiza, Roxas City. Natigayon nga marekober sa amu nga mga persona ang tatlo ka plastic sachet nga may unod sang suspected shabu, P1000 pesos nga marked money, cellphone, duha ka bilog nga disposable lighter, weighing scale, isa ka bundle sang empty small plastic sachet, mga aluminum foils kag iban pa nga drug paraphernalias. Ginabanta nga nagalab-ot sa P13, 600 pesos ang street value sang narekober nga ilegal nga druga. Ang amu nga mga persona ang magapangatubang sang kaso nga paglapas sa RA 9165 ukon Comprehensive Dangerous Drugs Act of 2002. Ginkumpirmar ni Punong Barangay Martin Antonio Pimentel nga yara nalakip sa listahan sang Barangay Anti- Drug Abuse Council ukon BDAC sang Barangay I ang subject person nga si Benedict Cleofas y Mabasa nga nadakpan sa buy bust operation sang mga katapo sang PDEA-Capiz kag Station Drug Enforcement Team sang Roxas City PNP. Suno kay Pimentel, una na nga nadakpan sa kasubong nga aktibidad ang amu nga persona apang nakaguha sa presuhan matapos nag-avail sang plea bargaining agreement. Ang amu nga persona ang isa ka drug surrenderee sa nasambitan nga barangay kag naka-atender na sa ginpatigayon nga anti-drug rehabilitation program sang gobyerno.

Facebook Comments