Duha na ang samaran sa puwersa sa gobyerno sa ilang padayon nga paggukod sa mga sakop sa gituohang mga sakop sa Guerrilla Front 12 sa New People’s Army sa lungsod sa Lumba Bayabao, Lanao del Sur.
Nagsugod ang operasyon sa tulo ka mga batalyon sa 103rd Infantry Brigade ug sa 15th Division Reconnaissance Company, Philippine Army, niadtoong Biyernes, Hulyo 26, dihang nadawat ang impormasyon gikan sa mga residente nga adunay mga armadong nagkampo sa bukirang bahin sa lungsod.
Matud pa ni LtC. Edgar Allan Villanueva, commander sa 49th Infantry Battalion, niadtong Sabado nakita sa mga sundalo ang gihimong “medical training” facility sa mga rebelde, apan dihang sudlon na unta niadtong Dominggo, kalit nga mibuto ang usa ka improvised explosive device o IED.
Gituyo, matud pa, nga butangan og IED ang ilang mga agianan aron maoy makapa-delatar sa pag-abante sa tropa ug makahigayon sa pagpalayo ang mga rebelde.
Naigo sa shrapnel ang duha ka mga sundalo sa 49th IB nga gidala na sa usa ka tambalanan sa Army sa Cagayan de Oro City.
Anaa na sa luwas nga kahimtang ang duha samtang padayon nga migukod ang tropa sa mga rebelled.
Ang Lumba Bayabao anaa sa boundary sa Bukidnon nga maoy pugad sa mga NPA.
