Patay ang duha ka sundalo, samtang samaron ang laing upat sa bag-ong engkwentro sa militar ug Maute-IS, sa Pagayawan Lanao del Sur, kagahapon.
Sumala ni Col. Romeo Brawner, Jr., commander sa 103rd Infantry Brigade, Philippine Army, mga miyembro sa grupo ni Owayda Benito Marohomsar, alyas Abu Dar, ang naka engkwentro sa tropa sa gobyerno.
Si alyas Abu Dar, nga maoy gituohang ig-agaw sa magsuong Maute, nga maoy nanguna sa pag-atake sa Marawi City, mao ang senior militant nga mitabang sa pag-plano sa pag-atake sa maong syudad niadtong Mayo 2017.
Sa dihang mamatay ang mga lider nga Maute nga sila si Omar ug Abdullah, kauban ang Abu Sayaff leader nga si Isnilon Hapilon sa mga ulahing bahin sa giyera, si Abu Dar ug uban pang mga kaubanan ang naka ikyas gikan sa kanhi main battle area.
Sa interview sa Radio Mindanao Network kang Brawner, nagpadayon pa ang engkwentro sa Pagayawan nga gikatahong maoy gitagoan sa grupo ni Abu Dar.
