Duha ka tawo, patay sa sunog sa Calaanan, Canitoan

88
PC: RadyoMaN Jonthan Bullo and RadyoMaN Jonathan Bullo

Duha ka tawo ang patay sa nahitabong sunog sa Block 25 lot 14 Zone 10- relocation site Habitat Calaanan, Barangay Canitoan ning syudad kaganinang alas tres sa kadlawon.

 

Mga biktima naila nga sila si Bomidiano Ramuga, 64 anyos, ug ang apo niini nga si Dexter Ramuga, 12 anyos, magtutungha sa Canitoan Elementary School.


 

Nasayran nga unang nakita sa Bureau of Fire protection kon BFP si Ramuga gawas sa cr, samtang sa sulod sa cr nakita ang bata.

 

Matud ni Fire Marshall Allan Gabot, ang Hepe sa BFP Cagayan de Oro nga ilang nadawat ang tawag alas 3:55 sa kadlawon ug pasado alas 4 ang fire out.

 

Nasayran nga 200 mil pesos ang damyos sa nasangpit nga sunog.

 

Samtang gibutyag ni Fire Marshall Allan Gabot nga ang pagka-suffocate sa aso ang namatyan sa mga biktima.

 

Tungod kay kung basehan ang mga paso sa lawas niini, gamay lang ang apektado.




 

Matud ni Fire Marshall Gabot nga ang sunog sama sa usa ka kawatan nga dili magsaba kung kanus-a mahitabo.

 

Kini ang hinungdan nga sa dili pa matulog, susihon ang mga electrical appliances kung kini naka-unplug, kung mogamit og katol kinahanglan layo sa mga panapton ug papel, aron nga malikayan ang sama niini nga panghitabo.

 

Samtang, wala magdahum si Corazon Ramuga ang asawa sa namatay sa sunog nga si Bomidiano Ramuga nga masunog ang ilang panimalay ug mamatyan sa duha ka sakop sa pamilya.

 

Nasayran nga ang pamilyang Ramuga nagnegosyo og sarisari store, piso net, eco bag ug pag-refill sa Liquefied petroleum gas aron nga maka-ayom ayom sa panginabuhi.

 

Apan matud ni Fire Marshall Allan Gabot sa Bureau of Fire Protection nga dakong bawal ang pagnegosyo sa petroleum gas hinungdan nga kung adunay sama niini nga report ila kining gakompiskahon.

Facebook Comments