General Santos City–Ginapaabot na lamang sa Polomolok PNP ang commitment order gikan sa korte batok sa duha ka most wanted person nga nasikop sa kapolisan aron hingpit nang mabalhin sa Provincial Jail sa Koronadal City.
Kahibaluan nga duha ka sunod-sunod nga operasyon ang gikasa sa naghiusang pwersa sa Provincial Intelligence Branch; South Cotabato og Polomolok Municipal Police Station sa pagpanguna ni Police Lieutenant Colonel Samuel Cadungon pinaagi sa pag implementa sa warrant of arrest batok sa mga nasampit.
Unang nasikop si Lordito Bolitin, 33 anyos, ulitawo usa ka mag-uuma og lumulupyo sa purok Sto. Nino, Barangay Glamang, Polomolok sa Barangay Calumpang dakbayan sa Gensan alas 7:00 sa gabie sa kasong frustrated murder dunay criminal case no. 5564-18 nga giisyu ni Hon.Judge Eddie Rojas sa RTC Branch 39-Polomolok niadtong Septyembre 25, 2018 nga dunay piyansa nga mukabat P200,000 nga girekomenda sa korte.
Samtang dakpan usab ang suspek nga si Erwin Mansuelas Dizon, 43 anyos, usa ka panday nga taga Barangay Upper Klinan, alas 8:00 sa gabie sa kasong pagsupak sa Art. Ll, Section 16 sa RA 9165 dunay criminal case no.2042-06 nga giisyu usab ni Hon.Judge Eddie Rojas sa RTC Branch 39-Polomolok niadtong Nobyembre 28,2018 nga walay pyansa nga girekomenda sa korte.
Nasayran nga gikonsidera ang mga nasampit nga anaa sa top 10 most wanted person. sa kasamtangan pabiling tingkagol sa lock up cell sa Polomolok Municipal Police Station ang duha ka mga dinakpan. (Reynald Timario)
