Margosatubig, Zamboanga del Sur – Patay ang kanhi piniriso samtang samaron usab ang kauban niini human kining gipamusil didtong dapita sa Purok Durian, Magahis, Poblacion Margosatubig, Zamboanga del Sur alas 8:45 kaganihang buntag.
Giila ang namatay nga biktima nga sila si Joel BiƱa Gallego, 39-anyos kanhi Zamboanga del Sur Provincial Jail detainee nga residente sa Purok-6, Baluno Dimataling Zamboanga del Sur samtang samdan si Jefty Kilat Tulba, 27 anyos, ulitawo ug kanhi usab detainee sa Zamboanga del Sur Provincial Jail ug lumulupyo sa Purok-2, Barangay Pikanan, Kumalarang Zamboanga Del Sur.
Sa inisyal nga imbestigasyon nasayran nga samtang sakay ang mga biktima sa single motor gikan sa Poblacion Margosatubig, Zamboanga del Sur paingon sa Baluno Dimataling apan kalit kining gidikitan sa riding in tandem ug gipamusil pag-abot sa Barangay Durian, Magahis, Margosatubig.
Nakahi-agom si Joel BiƱa Gallego ug samad pinusilan sa iyang likod ug laing usa ka igo sa ulo nga maoy hinungdan sa iyang kamatayon.
Samtang si Jefty Kilat Tulba, nakadagan pa apan naigo sa iyang bukton nga nagpa-alim karon sa Margosatubig Regional Hospital.
Sumala sa mga nakasaksi ang mga suspetsado nikagiw paingon sa lungsod sa San Miguel niining probinsya.
Nakuha sa dapit nahitabuan ang bala sa calibre 45 nga pistola.
Naglusad na og follow-up nga imbestigasyon ug hot pursuit operation ang tropa sa Margosatubig PNP aron sa pagsikop sa mga nakaikyas nga suspek.
