Davao City – Duha ka mga patay’ng lawas ang na rekober sa kapulisan sa Toril kun diin ang usa nakita nga naglutaw sa lapyahan sa kadagatan samtang ang usa nakita sa lungag nga labayanan og abo sa usa ka pugon sa kopras.
Base sa report, nakadawat og tawag ang kapolisan nga dunay usa ka wala pa malhing tawo ang naglutaw sa sapa diha sa may Sitio Lawis, Brgy. Lizada nga gitoohan nga anaa sa pangedarong 40-50 anyos ug sout lang ang underwear.
Matud pa nagsugod na sa pagkadugta ang lawas niini gani gidala na sa Rivera Funeral Parlor.
Ikaduhang patay’ng lawas naila nga si Orlie Canongan, 40-anyos, ug usa ka mag-uuma kinsa nagpuyo sa may Prk. 1, Brgy. Kilate, Toril ning siyudad.
Base sa report niadtong milabay’ng gabii nga kuyog pa sa pag-inum og bino ang biktima kuyog iyang higala nga si Rodrigo Manslagan.
Saysay pa niini nga paghuman sa ilang inum, kalit nga nahulog sa lungag ang biktima ug wala matud pa niya panumbalinga sanglit normal ra kuno nga kun asa kini maabti og kalango didto ra usab kini matulog.
Naka angkon og samad sa baba ug pagkasunog sa nawong ug sa dughan ang biktima.
Gidala na sa Toril Coop Funeral Parlor ang patay’ng lawas sa biktima ug gi-require kini nga i-autopsy aron masuta kun aduna ba kini foul play.
RadyoMaN Paul Canono
