Duha patay, samtang lima naman ang pilason sa nahulog nga Kia close van nga nakarehistro sa LGU Lambayong sa pil-as sa Barangay road sang Purok Daisy, Barangay Kablon, Tupi, South Cotabato , pasado alas 3:30 sang hapon, kahapon nga adlaw, Nobyembre 10, 2020.
Ginkilala ang mga nabawian sang kabuhi nga sanday Boy Vinluan, 47 –anyos (dead on the spot) kag Mela Marquez, 50 –anyos (dead on arrival sa ospital), pareho residente sang Barangay Namnama sang nasambit nga banwa.
Samtang pilason naman sanday Elezabeth Madsig, Len Len Salinugen, Alhakbar Balindang kag Badrodin Salinugen, pareho residente sang Lambayong, Sultan Kudarat. Pilason man ang driver sang Kia close van nga si Mamot Tungkay, 38 –anyos kag residente sang Lambayong, Sultan Kudarat nga gindala naman sang iya nga utod sa Tacurong hospital para sa nagakaigo nga medikasyon.
Sa imbestigasyon sang Tupi MPS halin sa Matutum blooms, Sitio Glandang, Barangay Kablon,Tupi, South Cotabato ang mga biktima nga empleyado sang LGU Lambayong nga nagpatigayon suno pa sang benchmarking sa pagtanum sang nagkalain-lain nga klase sang bulak kag iban pa nga mga tanom.
Apang sang papauli na ang mga ini, nadulaan sang brake ang ila nga ginasakyan kabangdanan sa pagkahulog sa pil-as sang salakyan.
Ginkumpirmar naman ni Lambayong Municipal Administrator Engineer Roelle Aradanas nga ang duha sa mga biktima nga ang isa ang nabawian sang kabuhi ang indi empleyado sang LGU kundi nakisakay lang.
Samtang ginsalo naman sang LGU suno kay Aradanas ang gasto sa hospital sang mga pilason kag subong man ayuda sa mga nabawian sang kabuhi.
