Davao City – Gipusil-patay ang duha ka mga lalaki sa Purok San Roque, Brgy. Puntalinao, Banaybanay, Davao Oriental niadtong Mayo 6, 2018 alas 6:30 sa gabii.
Sa report gikan sa Police Regional Office kun PRO XI, giila ang mga biktima nga sila Joey Espada, 43 anyos, security guard samtang ang usa giila nga si Ronnie Mel Baladiama, 19 anyos, truck helper, ug pulos mga residente sa Sitio Tapis, Brgy. Tambongon, Pantukan, Compostela Valley Province.
Sa inisyal nga imbestigasyon, nagsakay matud pa ang mga biktima sa motorsiklo pauli sa ilang balay apan pag abot sa nasangpit nga shooting incident area, kalit sila gipusil sa mga suspek nga nakasakay usab sa tulo ka motorsiklo.
Nakaangkon og daghang samad pinusilan ang mga suspek hinungdan sa ilang hinanaling kamatayon samtang ang mga suspek daling misibat sa wala matinong direksyon.
Narekober sa kapulisan ang 34 ka mag spent bullets ug 3 ka unspent bullets sa wala matinong kalibre sa armas.
Sa karon naghimo na og follow up investigation ang Banaybanay Municipal Police Station aron masuta og unsay motibo sa maong pagpamusil ug madakpan usab ang mga mihimo sa maong krimen.
RadyoMaN Renz Barbarona
