General Santos City— Duha patay samtang upat ang arestado sa nahitabong operasyon sa Regional Drug Enforcement Unit 12, RMFB 12, Sarangani Provincial Mobile Force Company ug uban pang unit alas 2 pasado ang takna sa kadlawon sa may Lun Padido ug Sapu Masla, Malapatan Sarangani Province.
Giila ni Police Chief Inspector Aldrin Gonzales, tigpamaba sa Police Regional Office 12 ang mga target nga silang Rene Unos Kamid, Napia Unos Kamid, Jannete Orquillas, Al Sambaga ug Rakib Morid.
Sumala pa nga dihang gisulod ang balay ni Al Sambaga, gipabuthan matud pa niini ang tropa rason nga mibalos kung asa napatay ang nahisgutan kung asa nakuha gikan sa posisyon niini ang sachet sa gituuhang shabu, calibre 38 nga armas ug usa ka hand grenade.
Dugang pamahayag ni PCI Gonzales nga patay usab ang usa sa mga target nga si Rakib Morib human nga iyahang gipabuthan ang operatiba nga dihang gisulod ang iyahang panimalay kung asa nakuha gikan sa iyahang posisyon armas ug managlahing sachet sa gituuhang shabu.
Sa karon, padayon ang ginahimong imbestigasyon sa mga nahisgutan kung lambigit sa usa ka organisadong grupo ang mga nahisgutan. Samtang ginasuta pa nila kung anaa sa target list ang mga suspek apan tungod sa ila ang nahimong target sa operasyon, posibleng anaa sila sa radar sa RDEU.
