Pikit, North Cotabato—Duha ang patay samtang usa ang nakasibat sa gipahigayung operasyon sa hiniusang pwersa sa PDEA 12, Pikit Municipal Police Station, Cotabato Provincial police office, RMFB 12 ug 90th Infantry Battalion Philippine Army sa Sitio Gangtong, Brgy. Manaulanan, Pikit , human misukol sa otoridad.
Sumala pa nga gi-serve sa otoridad ang duha ka mga search warrant sa panimalay ni Robin Bulod Alias Bakto ug sa amahan niini nga si Mutalib Bulod alas 2:00 sa kaadlawon kung asa ginapangita ang mga iligal nga droga ug armas.
Naka bantay matud pa ang mga suspek ug misukol nga miresulta sa kamatayon ni Robin Bulod ug kuaban niini sa balay nga si Asty Bulod nga parehong nakaangkon ug samad pinusilan sa ilahang lawas, samtang malampusong nakasibat ang usa sa target nga si Mutalib.
Nakuha sa panimalay ni Robin mao ang 54 ka mga sachet sa shabu nga gibana-banaang anaa sa 11 ka gramos, pusil ug mga bala, ingon man usa ka granada samtang sa panimalay sa nakasibat nga si mutalib bulod narekober ang 42 ka mga sachet nga adunay gibug-aton nga 10 gramos, drug paraphernalia, m16 riffle, mga buhing bala, ug duha ka hand grenade.
Ang mag-amahan ang gikaingong supplier ug droga sa Pikit, North Cotabato kung asa nabaniug matud pa ang pangalan sa mga nasangpit sa maong lugar gumikan sa ilang iligal nga gimbuhaton.
Sa kinatibuk-an mokabat sa 96 ka mga sachet sa shabu ang narecover sa PDEA 12 gikan sa posisyon sa mag-amahan nga gibana-banaang nagkantidad ug 142,000 ka pesos.
Sa karon giandam na sa PDEA 12 ang kasong pagsupak sa RA 9165 ug kalapasan sa RA 10591 batok sa suspek nga nakasibat.
