Davao City – Duha ang patay, usa ang luwas samtang usa ang padayon pang ginapangita sa Bureau of Fire Protection (BFP-Davao) ug Brgy. 19-B Fire Brigade human gideklara’ng fire out alas 5:00 sa buntag ang nasunog nga panimalay sa pamilya’ng Pascual.
Giila nga si Pamela Pascual, maguwang nga anak, ang naluwas sa maong insidente kinsa nagpa-alim na karon sa Southern Philippines Medical Center (SPMC) samtang nag gakos nga nakita ang nasunog nga lawas nila ni Rose Pascual, inahan ni Pamela, ug ang manghod niini nga si Carmela Pascual samtang padayon sa gihapon nga ginapangita ang amahan niini nga si Christopher Pascual.
Sa inisyal nga report sa kabomberohan, alas 3:30 kaganihang kadlawon miulbo ang sunog sa Blk. 22 Lot 3 Oxford St., NHA Village, Buhangin ning syudad sa Davao, diin napasagdaan nga naka-charge nga gadget ang ginalantaw nga tinubdan sa maong sunog.
Sumala pa taas ang pader ingon man naka-kandado ang gate sa panimalay sa pamilya’ng Pascual rason nga naglisod og sulod aron mutabang ang mga silingan niini.
Sumala kang Earl, kinsa nakasalbar kang Pamela, giguba matud pa nila ang gate sa maong panimalay human makadungog nga adunay misinggit og sunog alas 4:00 pasado apan grabe ka baga ang aso rason nga si Pamela lamang ang ilang naluwas.
Sa pagkakaron, ginapaabot na lamang ang Scene of the Crime Operatives (SOCO) alang sa pagkuha sa patay’ng lawas sa mga biktima ingon man sa imbestigasyon sa maong insidente.
RadyoMaN Jason Amisola
