Maswerte nga wala napuruhan ang duha ka biktima sa nagluntad nga pagsigabong pasado alas dose kaina sang kaudtuhan sa kilid sang Christ the king Cathedral Rizal Street, Syudad sang Koronadal matapos ang ginapatigayon nga bunyag sa nasambit nga simbahan.
Sa exclusive interview sang RMN Koronadal sa mga biktima, ginhambal ni Dindo Zamora, 39 anyos, tricycle driver, residente ng Purok. Siodina Brgy. GPS Koronadal City, nagdul-ong lang sya sang iya pasahero sa nasambit nga simbahan, apang hinali na lang nga nagsigabong ang ginaaligar bomba nga nakasakay sa isa pa ka tricycle.
Dugang pa nya, igo lang sang kahoy ang nakapilas sa iya bibig kag likod kag makabig nga yara na sa maayo nga kahimtangan.
Samtang ginhambal naman sang isa pa ka biktima nga ginkilala kay Henerosa Sumargo, 44anyos, residente sang Purok Malipayon, Barangay Topland sa nasambit nga syudad, sakay sya sa isa ka habal-habal nga motor padulong sa nasambit nga simbahan para magsugat sang iya bata matapos maulamid sa insidente.
Bun-og naman sa kalawasan ang naangkon ni Helen Payunan, manunudlo, 48anyos, residente sang Osmeña Street, Brgy. Zone I Syudad sang Koronadal matapos maglumpat sa ginasakyan nga tricycle.
Samtang ginhambal naman sang isa ka testigo nga nasulod sa itom nga bag ang ginaaligar bomba kag ginbutang sa likod sang isa ka tricycle bag-o ini nagsigabong, apang wala sya sang ihibalo sa identity sang mga suspek
Kaangot sini ginpahayag ni Police Chief Supt Marcelo Morales, Regional Director sang PNP Region 12 posibli diversionary tactics ang ginhimo sang mga teroristang grupo matapos ang law enforcement operation sang South Cotabato PNP sa ila lugar kag pagtimalos sa kapulisan bangud suno pa sa pagdakop sa mga teroristang grupo.
Dugang pa nya, isa ka babae ang ila suno pa nga ginadudahan nga nagdala sang itom nga plastic bag nga may unod sang ginasuspetsahan bomba.
Sa subong padayon pa ang ginahimo nga imbestigasyon sang awtoridad kun ano nga grupo ang may kahimuan.
