Dul-an 60 LGU-Samal employees nagpositibo sa COVID-19

Davao City – Gikumpirma ni Island Garden City of Samal (IGaCoS) Mayor Al David Uy nga muabot na sa halos 60 ka mga empleyado sa Local Government Unit (LGU) sa Samal, Davao del Norte ang nagpositibo sa Coronavirus Disease 2019 (COVID-19).

Gibutyag ni Mayor Uy, sa interbyu sa city-owned radio, nga kini human nga anaa sa kapin 1,500 ka indibidwal ang gipailawom sa COVID-19 testing.

Duda usab ang Alkalde nga aduna nay nakasulod nga laing variant sa COVID-19 sa syudad rason sa pagtaas sa kaso sa lugar, diin ila gilayong gipailawom sa isolation ang maong mga pasyente ug nagpahigayon og contact tracing sa close contacts sa nahisgutan.


“Duda gani nako nga basi’g naa nay new variant nga nakasulod (sa Samal). So, dili gyud na malikayan. Ang what is ano nalang.. murag consolation nalang nato is that we were able to isolate them, na-isolate nato sila dayon,” matud ni Uy.

Tan-aw usab ni Mayor Uy nga posibleng hinungdan sa pagtaas sa cases ang pag-abri sa turismo sa Samal, hinungdan nga gipaubos sa 60% gikan sa 75% ang resort capacity sa isla ug pagsiguro nga luwas sa COVID-19 ang mga musulod nga turista.

RadyoMaN Kirby Manzon

Facebook Comments