Davao City – Natunulan na sa lokal na panggamhanan og tabang ang tanang mga apektado sa sunog sukad niadtong Disyembre.
Matud ni CSSDO Ugnayan Section Head Ma. Luz Farañal atol sa interbyu sa RMN Davao nga natapos na nila ang pagtunol sa mga pinansyal nga ayuda niadtong Biyernes Enero 18.
Mokabat sa P417,000.00 ang cash assistance nga gihatag ngadto sa 31 ka mga indibidwal ug 39 ka mga pamilyang nasunugan niadtong Enero 8 sa Purok San Jose, Waling-waling St., Daliao, Toril.
Gisulti ni Farañal nga P891,000 ang sumada sa cash assistance nga naapod-apod sa mga apektado sa sunog sa Matina Aplaya, Matina Crossing ug Daliao, Toril ning syudad.
Sumala sa CSSDO nga kada pamilya nidawat og P10,000, P5,000 sa mga sharers ug P2,000 ang kada boarders.
Pahimangno ni Farañal sa tanang mga residente nga dili gayod pasagdan ang ilahang mga niluto nga mamahimong hinungdan sa sunog.
Siguraduhong una mobiya sa mga panimalay walay nakasaksak nga mga appliances ug ibutang sa mga lugar nga dili makab-ot sa mga bata ang mga posporo, lighters ug kandila aron dili kini madulaan sa mga bata.
RadyoMaN Aimee Guinita
