Patay ang isa ka soldado kag pilason ang isa pa matapos nga ginluthang sang magpalaka-isa sa Brgy. Pandanan, Lauan, Antique sang nagligad nga sabado sang gab-I Pebrero 23, 2019.
Ginkilala ang mga biktima nga sanday PFC Kim Jeson Cordero 24 sang Lanao Del sur, patay, samtang pilason naman si PFC Jason Espiel sang Surigao Del Sur kag Cpl Miguelito Perez.
Suno sa kay, Police Supt. Alexander Rosales ang hepe sang Lauan Municipal Police Station naga-inom ang mga biktima sang ginluthang sang grupo nanday Gilbert Necor y Lavega alyas Bobet Brgy. Treasurer, Brgy. Tanod George Lavega alyas Murok, Brgy. Kagawad Christopher Lavega kag ni Jeoffrey Legaspi alyas Jombi lunsay pumoluyo sang katupad nga barangay Virginia sang nasambit man nga lugar.
Dugang pa ni, Rosales nga nag-upod pa inom ang mga suspek sa mga biktima apang nagpauli ang mga ini pagkaligad sang lima ka minutos.
Sa ila pagbalik, didtu na kag hinali lang nga ginluthang sang mga ini ang mga biktima nga wala na sang nagluntad nga pagbina-isay.
Gilayun nga napatay si PFC Cordero kag pilason naman sanday Cpl. Perez kag PFC Espiel samtang napatay man ang isa sa mga suspek nga si Goerge Lavega matapos nga nakapalopok pa ang isa sa mga biktima.
Dumot kag kahulogbon ang ginalantaw nga motibo sang mga otoridad sa pagluthang sang mga suspek sa mga biktima kon sa diin ginsita sang kaupod sang mga biktima ang suspek nga si Goerge La Vega bangud sa pagbitbit sini sang armas luthang sang nagligad nga tuig 2018 bulan sang Nobyembre.
Sa panaysayon sang mga saksi nakita ang suspek nga si Gilbert Necor Brgy. Treasurer nga amo ang nagluthang sa mga biktima nga nadakpan sang mga otoridad kag narekober man ang isa kalibre 357 kag caliber .45.
At-large pa tubtob subong ang duha ka suspek nga sanday Brgy. Kagawad Christopher Lavega kag si Jeoffrey Legaspi samtang yara na sa luwas nga sitwasyun ang duha ka soildado nga ginabulong sa Bugasong Hospital.
