Davao City – Samtang hinanok sa pagkatulog sa sari-sari store gituyo og sulod ug gipusil-patay alas-6:30 sa gabie niadtong Sabado, Oktobre 2, 2021, sa wala pa mailang suspetsado si Brgy. Datu Salumay, Marilog District Kapitan Amado Mansamo Mansabid, 55 anyos.
Matud sa mga menor de edad nga mga pag-umangkon sa biktima kinsa mga saksi sa insidente samtang nag-andam sila og panihapon usa ka lalaki ang naka-helmet, naka-face mask, naka-jacket og gray ug naka maong nga pantalon ang niduol ug nangutana kung asa ang kapitan ug gitudlo nila kini nga natulog sa tindahan ug didto gipaulanan og bala ang biktima.
Human sa pagpamusil sa gunman nagpabuto pa kini sa iyahang armas sa gym sa Purok 1, Brgy Datu Salumay, Marilog District dayon nisibat sa wala na matinong direksyon.
Sa interbyu sa RMN Davao kang Police Captain Philip Dave Uddin, Officer In-Charge sa Marilog Police Station, nakahiagom og daghang samad pinusilan sa nagkadaiyang parte sa lawas ang punong barangay nga hinungdan sa iyahang kamatayon.
Posibleng motibo nga gilantaw sa awtoridad mao ang personal grudge may kalabutan sa land conflict tungod ang biktima gawas nga kapitan kini sa maong Barangay, chairman usab kini sa Council of Elders sa Tribong Matigsalog nga gahawid og mga kaso sa land disputes.
Pito ka mga fired cartridge sa .45 kalibreng baril ug 4 ka slugs ang narekober sa SOCO sa crime scene ug kasamtangang gisumite alang sa ballistic examination.
Gidala ang patay’ng lawas sa kapitan sa Freedom Life funeral home sa Calinan ug gihaya na kini karon sa ilahang panimalay sa Datu Salumay.
RadyoMaN Aimee Guinita
