Panit-an, Capiz- Apat ang pilason samtang isa gid ang dimalas nga ginbawian sang kabuhi matapos nagbunggo-anay ang dump truck kag tricycle sa Brgy. Agkilo, Panit-an, Capiz ala 1:30 kaina sang hapon.
Gindeklarar nga dead on arrival ang sakay sang tricycle nga ginkilala kay Gina Felipe sang Madulano, President Roxas, Capiz sang ini ang gindangat sa Bailan District Hospital.
Samtang pilason man ang driver nga amo si Bonifacio Dacles kag ang mga backrider nga ginkilala kanday Gina Barredo, Teresita Baydo kag Joan Derramas sang Brgy. Agloway, Panit-an, Capiz.
Nahibaluan nga nagikan sa banwa sang President Roxas ang mga ini kag buot kuntani nga magpadulong sa Panit-an agud nga magbaligya sang pasayan. Apang pag-abot sa nasambit nga lugar, aksidente nga nabungguan sang dump truck nga ginamaneho ni Herdo Villegas sang Doña Javellana Subdivision Bacolod City, ang tricycle nga ginasakyan sang mga biktima.
Padayon pa ang imbestigasyon sang mga kapulisan sa nasambit nga vehicular accident.
