Labangan, Zamboanga del Sur – Naharang sa kapulisan sa Labangan ug sa mga personahe sa Provincial Environment and Natural Resources Office (PENRO) ang mini dump truck nga adunay kargang balas atol sa gipahigayong checkpoint kagahapon sa udto sa New Labangan, lungsod sa Labangan, Zamboanga del Sur.
Gikumpiska atol sa checkpoint operation ang usa ka unit sa ISUZU MINI DUMP TRUCK color pink nga walay plate number nga adunay kargang 4 ka cubico sa balas gumikan kay pakyas nakapakita sa mga dokumento ang nagmaneho niini.
Ang driver ang giilang si DULO AMANDORON FUENTES, 23 anyos, ulitawo ug residente sa Purok Santan B, San Jose District, Pagadian City ug ang maong dumptruck nakarehistro sa pangalan ni MARJHON M. GAMBAYAN taga San Pedro nga sakop ning syudad sa Pagadian.
Ang nakumpiskang sakyanan ang kasamtangang nasa kustodiya na karon sa Provincial Environment and Natural Resources Officer (PENRO) alang sa tukmang disposisyon.
