Duna nay persons of interest ang Special Investigation Task Group sa pag-ambush sa sakyanan ni San Fernando Mayor Lakambini Reluya didto sa Linao Talisay sa niaging gabii.
Apan gitataw sa SITG nga di pa kini matawag nga mao na gyud ang mga suspek sa krimen.
Ang tigpamaba sa SITG nga si Supt. Virgilio Bayon-on nibutyag nga naghimo pa ug case build-up ang mga imbistigador alang sa dinalian nga kasulbaran sa nahitabo nga ambush.
Dili lang politika ang ilang gitutokan kung di ang tanang posibling motibo human sa nadawat usab nila nga mga impormasyon nga di pa ikabutyag sa kapolisan .
Gipasalig ni Bayon-on nga di magpataka ug tumbok ang kapolisan ni bisan kinsa na lang nga mga di tinood nga suspek , tungod lang gitagaan sila ug duha ka semana sa pagsulbad sa krimen.
Ang SITG nag langkob sa CIDG7, Regional Intelligence Unit-7, Regional Legal Division 7, PNP Cyber Crime Group 7, Regional Investigation and Detective Management Division, Talisay City Police Station ug ang Cebu Provincial Police Office.
Tulo ang namatay sa maong insidente apil na ang bana sa mayor nga si Kapitan Ricardo Nonoy Reluya Jr.
