ILOILO – Kamatayon ang katapat sang mga positibo nga nagagamit sang illegal drugs subong man ang nagaresist sa kampanya kontra illegal nga droga sa banwa sang Alimodian.
Ini ang statement ni Mayor Geefre ” Calay” Alonsabe agud masustenir nga drug cleared municipality ang banwa sang Alimodian bangod nagapati siya nga indi lang isa ka adlaw ang pag-away sa illegal nga droga.
Ginpahayag ni Alonsabe nga iya ginmanduan ang Hepe sang Alimodian nga patyon ang kon sin-o man nga ila madakpan nga may resistant ukon nagabato kag ang mga na-identify na kag ginhatagan sang warning apang liwat nagahimo sang illegal.
Suno kay Alonsabe, wala sang lugar ang mga ini sa Alimodian agud halitan ang mga pumuluyo ilabi na ang mga pamatan-on nga amo ang paglaum sang palaabuton.
Dugang pa ni Alonsabe nga very persistent ang LGU sa idalom sang iya administrasyon sa pag-away sang Illegal nga droga kag illegal gambling gani iya ginahingyo ang mga pumuluyo mag-ugyon.
Nagapati si Alonsabe nga kon tingob ang tanan sa pag-away sang illegal nga aktibidad, may yara gid nga kasulbaran kag malab-ot ang handom nga kauswagan sang ila banwa.
